மட்டக்களப்பு வந்தாறுமூலை கிழக்குப் பல்கலைக்கழக கல்வி நடவடிக்கைகள் மறு அறிவித்தல் வரை இடை நிறுத்தப்பட்டுள்ளதாக பல்கலைக்கழக நிர்வாகம் அறிவித்துள்ளது.

இதையடுத்து பல்கலைக்கழக வளாகத்தினுள் தங்கியிருக்கும் அனைத்துப் பீட மாணவர்களையும் உடனடியாக வெளியேறுமாறு பல்கலைக்கழக நிர்வாகம் நேற்றுக் காலை அறிவித்திருந்தது.

பல்கலைக்கழக துணை வேந்தர் கலாநிதி என்.பத்மநாதன் கடந்த புதன்கிழமை மாணவர் குழுவொன்றால் மிகக் கடுமையாக மிரட்டப்பட்டு துணைவேந்தர் பதவியிலிருந்து இராஜிநாமா செய்ய வைக்கப்பட்ட நிலையிலே அங்கு தோன்றியுள்ள மோசமான சூழ்நிலையில் நேற்று முதல் பல்கலைக்கழக கல்வி நடவடிக்கைகள் இடைநிறுத்தப்பட்டுள்ளன.

இது தொடர்பாக பதில் உபவேந்தர் நேற்று வெளியிட்ட அறிக்கையில்;நேற்று 12 ஆம் திகதி கிழக்குப் பல்கலைக்கழகத்தில் இடம்பெற்ற அவசர மூதவை கூட்டத்தின் பிரகாரம் பல்கலைக்கழகத்தில் அண்மையில் இடம்பெற்ற மாணவர்களிடையே ஏற்பட்ட அமைதியின்மையை கட்டுப்படுத்தும் முகமாக கிழக்குப் பல்கலைக்கழக வந்தாறுமூலையில் இயங்கிவரும் கலை கலாசார பீடம், வர்த்தக முகாமைத்துவ பீடம், விவசாய பீடம் மற்றும் விஞ்ஞான பீட உள்ளக மாணவர்களுக்கான அனைத்து கல்வி நடவடிக்கைகளும் உடனடியாக இடைநிறுத்தப்படுவதுடன் மாணவர்கள் பல்கலைக்கழக வளாகத்தினுள் நுழைவதற்கும் தடை விதிக்கப்பட்டுள்ளது.

அத்துடன் விடுதியில் தங்கியுள்ள அனைத்து மாணவர்களும் உடனடியாக விடுதிகளை விட்டு வெளியேறுமாறு அறிவுறுத்தப்பட்டுள்ளதாகத் தெரிவிக்கப்பட்டுள்ளது.